Lasta novajo di hodie ante irar a lito. Danko a helpo da Dave MacLeod me komencis ri-vivigado di altra idala ret-situo, La Mondo en Ido. Hike esas mea unesma sendajo:

Nova kontribuisto a ca blogo

Dave facis gradega laboro favore Ido en 2005-2006, uzante ca blogo kom sua precipua instrumento. Me tre dubas ke me esos kapabla kontinuar ta laboro en sama amplitudo kom Dave, ma me esperas okazione sendar ula kontenajo. Me vidas venonta 2012 kom granda por Ido, e kun ula fortuno, ni sucesos!

Permalink | Leave a comment  »

Permalink | Leave a comment  »

Pos su sekigir, ni fine esis pronta deskovrar Azrou, la Berberiana urbeto. Nia nova amikino Noelle afablege montris nin la medina, anciena parto di urbo. To esis vere unesma medina dum nia kurtega voyajo, e to esis fakte tre bona introduktajo. Nun me komprenas ke se ni irus a medina di Fes ye nia unesma dio, to esus tro shokanta.

Medina di Azrou ne esas granda, ne esas tante plena de homi, e mem ne aspektas tre anciena. Forsan nur personi kun developita orientadala kretinismo povus perdar su adhike.

Ja en Azru ni unesme senteskis ke omna medina esas un granda bazaro. Omni vendas ulo. Hike vendasas legumi:

E hike vendesas olda furnituro. Noelle (dextre en suba fotografuro) nin dicis ke tota furnituraro en su domo esas komprita en ica merkato. Segun mea observaji, me tre dubitas - tadie, me ne vidis unika stulo, tablo o lito en bona stando.

Pos kurta exkursiono, ni manjis tipala lokala disho ke esas supo de fabo. To esis tre mikra manjeyo en sama strato ke la butiko ube ni evaporigis aquo ek nia vesti. Supo esis nekredeble chipa, e malgre (evidente) la qualeso di ca simpla manjajo ne esis di Michelin-nivelo, nia stomaki plenigis kun varma kalorii.

La populo di Maroko esas precipue mohamedista. Moskei esas omnaprezenta. Specalajo di Alt-Atlas regiono esas granda parto di Berbera habitantaro. En ica fotografuro, on povas vidar viri en berbera longa vesti qui iras a moskeo.

On nia retro-voyo, ni kompris bonega legumi en merkato di Ifrane e koquiis la borsch (yes, la famoza supo Rusa), quo esis plezanta surprizo a Josiah, qua esas vera rusofilo. En ca fotografuro, ni portas rus-linguala libri (en mea mano, videsas frazo-libro di la Rusa linguo da Lonely Planet. Ve, ca libro kontenas ula neexpektita vorti e frazi. Me mem dicus "vortachi" - quankam ta frazi esas plu simila a vera linguo quon on parolas en la strati di urbi en Rusia

Nextadie, ni decidis ne restar pluse en nivoza e kolda Ifrane e retrovenar a plano, en Meknes, unesma di "imperiala urbi" en nia voyaj-projeto.

...duro sequos...

Permalink | Leave a comment  »

Ye la duesma dio, matine, ni ireskis a staciono di autobusi, por komprar bilieti a Ifrane - Suisiatra urbeto en monti di Atlas. Vendisto de bilieti en la staciono dicis a ni ke esas nur un autobuso, quo kustumale iras ad Ifrane de Fes omnavespere, ma "cadie la voyo esas klozita por autobusi". To esis grava novajo qua rompis nia projeti por la dio. Ni vere projetis ke ni rapide atingos la monti por juar tranquila naturo. Fortunoze, nin vidis un viro qua komplektigis tale nomizita "grand taxi" e propozis rapida transportado ad Ifrane por plu granda pekunio. To esis quaze la unika posibleso por kontinuar nia projeto, do ni konkordis kun kondicioni, qui esis fakte sat chera

Dum nia voyajo quo duris min kam un horo, la naturo chanjis - la verda feldi desapareskis e ni vidis la foresti di cedro(?)-arbori e la nivo.

Kande ni fine arivis a Ifrane, ni astonesis pri la quanteso de nivo. Tota urbo esis kovrita da kelka centimetri de ca blanka substanco. Ni desfacile renkontris kun nia CouchSurfing-amiko, amerikiano Josiah, qua laboras kom bibliotekisto en lokala unversitato. 

Josiah montris a ni sua (varmega!) hemo e donis bona konsili quale atingar Azrou - altra urbo duacent metri plu basa (ca 1440m vs 1640m en Ifrane) ube esis min nivo ed ube habitas altra muliero, franciana Noelle, quon ni anke povus renkontrar.

Kande ni venis ad Azrou kun altra "grand taxi", ni havis tre multa aquo en nia shui e vesti. Fortunoze, Noelle trovis nin che kafeyerio e guidis a la hemo di sua amiki. Ibe ni trovis fayro, agreabla diskuto pri multa temi en Hispana e Franca lingui, ed anke dolca Marokana teo!

Advere, to esis la unika butiko en tota lando ube ni ne esis atakita da vendisto.

Anke ni esis akompaniata da kati - en Maroko vivas certe plu multe kati en Hispania!

...duro sequos...

Permalink | Leave a comment  »

Por vivigar mea idolinguala blogo che Posterous, me sendos kelka fotografuri pri mea recenta voyajo a Maroko. La voyajo duris nur quar dii lastasemane – kompreneble, to ne suficas vidar ula bona parto di lando. Ni (me voyajis kun mea spozino Lena) flugis de Sevilla en Hispania ad aeroportuo di Fes, un de 'imperaiala urbi' en centrala parto di Maroko. Nia programo esis vizitar du ek tri imperiala urbi, Fes e Meknes, e (por formigar la triangulo di nia voyo) mikra urbi en monti di Atlas.

Unesma vesperso ni esis en la domo di nia amiko Hicham, quon ni konoceskis en Fuengiola pasinta-ayare dum linguo-kambio renkontri. Ye unesma di januaro il retrovenis a Maroko pos laborar mez-yaro kom tradukisto en lokala polico-kontoro. Il esis sat joyoza ke ni vizitis lu en Maroko. Nam il nuntempe laboras en Rabat, Hicham esis tre afabla por venir a Fes en mezo di semano por renkotrar nin en aeroportuo ed vehigar a sua domo. Fakte, to esis domo di lua parenti, Abdelmalek e Huria. Ni savis nulo pri lia domo ante venir, do ni esis vere shokita kande ni trovis grandega domo kun spacoza salono kun tekto simila ad Alhambra.

Ni esis fatigita pos laborala matino, longa voyo per automobilo a Sevilla, e fine, la flugo a Fes. Do, ni simple babilis kun Hicham, drinkante nia unesma marokana teo kun famoza arabiana dolcaji, e lernante unesma frazi en Araba linguo. Regretinde, nextamatine, Hicham devis irar trene a Rabat por kontinuar sua laboro, do ni mustis ipsa konoceskar la nova parto di Fes, inkluzante komprado di bilieti ad Ifran, urbo en la monti.

duro sequos...

Permalink | Leave a comment  »

Ye 28esma di febrero, habitantaro di Andalucia, maxim sudala provinco di Hispania, esas probable plu felica kam altra parti di lando. Esas tale pro la festo quo eventas omna yaro cadate, la Dio de Andalucia. Olu esas vera festdio, andaluciani ne laboras.

Cayare festo eventis lundie, ed ico signifikis bone longa semanofino por ni omni hike. Multa homi vehis ad altra regioni di provinco, vizitante sua amiki e familii, o simple explorante la loki. Kun mea spozino e du amiki me iris a Priego de Cordoba, bela urbeto cirkume 170 kilometri fora de mea hemo. Pedirante, on povas vizitar omno dum kelka hori, do nesurprizante, ni promenis sama stradi kelkafoye, dum la jorno e dum la nokto.

Me povus skribar longa raporto pri la vidindaji, parki, arabiana termi, kasteli... Ma cafoye, me simple montros la fotografuro di plakato quon ni vidis en la biblioteko di vilajo Iznajar, ube ni kurte juis la vidaji sur nia voyo adheme ye la lasta dio di nia voyajo. Ni eniris al biblioteko jus pos multa vilajani finishis la ceremonio di elekto de maxim bona plakati dedikita a la festo. Meaopinione, mem ica plakato da yunega skolano esas impresiva, ed ol ne esas lo ke ganis la unesma premio!

Permalink | Leave a comment  »

Lastasemane ni promenis el la granda belega parko di Benalmadena, nomizira "parque de la paloma". Ibe on povas vidar multa uceli, qui tote ne timas la numeroza homi repozanta en la parko. Ma esas ankore un surprizanta kozo e la parko - gardeno di kaktusi. Ica planti kreskas bone en varmega klimato di Sud-Hispania, e tre diferanta specii esas reprezentata a vizitanti.

Vidante a la fotografuro qua videsas supre, me sempre pensas pri la geometrio.

Permalink | Leave a comment  »

Quik ni decidis vehar plu proxime, e per la helpi di Google Earth me saveskis ke ca monti nomesas "Sierra de las Nieves". Amuzive (e shaminde) me nultempe pensis ke la direta traduko (nivoza monti) povas esar vera. Bone, posibla exkuzo esas ke ni ne vivis en Andalucia en januaro e pro to ne povis vidar la nivo ibe antee.

Supre, on povas vidar la panoramo di Tolox, la urbeto en "la sierra", lumizita per sideskanta suno. Silenco, bona aero, oliva ed almonda arbori - la naturo di ca loko esas astonive bela!

Permalink | Leave a comment  »

Ma to esas altra afero - hodie me vere inventis la vorto e me sendubite pozas l'asterisko. Kompreneble, to ne esas la vorto por diskutar che Linguala Komitato, adminime nun, kande multega plu urjenta vorti vartas su turno. Ma por mi ipsa, la fenomeno di divansurfado* esas tro importanta por evitar specala vorto.

Segun me, divansurfar* signifikas vizitar ulu uzante "couchsurfing"-servico. Me audabis ke la sama ideo uzesis da esperantisti dum multa yari e lore to nomesis "pasporto servo" o simile (me tote povas erorar e pregas pardono). Couchsurfing elevigas gast-bonveno a nova niveli pro sua aperteso ad omni, ne nur adepti di sama idei.

Me esas membro di CouchSurfing-reto dum lasta 5 o 6 yari e me renkontris multa intersanta personi, lernis multe da ni e, me esperas, helpis li kun plu profunda kompreno de vivo en Estonia. Kelkafoye me difuzis la ideo di internaciona lingui a ti, qui esis pronta por komprenar ol. Me anke persuadis nia samideano Tiberio (sekretario di Linguala Komitato) membreskar e me esperas ke forsan kelka lektanti di ca blogo anke intereseskos.

Ica ne tre klara fotografuro supre esis facata en mikra restorerio en Mijad, adube ni iris kun Ronan, mea nova amiko e divansurfisto*, qua vizitis me tre kurte lastasemane. Okazione, me sendos fotografuri da me kun altra surfisti

Permalink | Leave a comment  »

Lasta semanofino markigesis da plukurtigado di mea haro e la promenado en Puerto Banús, quo esas distrikto di Marbella, plu granda urbo sur la Costa del Sol apud Fuengirola (ube me nuntempe habitas). Sur la fotografuro supre, vi vidas amba eventi kombinata. Mea spozino esis tre jokema por selektar ica aspekto sen dicar me pri to. La rezulturo esas meaopione tre amuziva.

Permalink | Leave a comment  »

Ka me esas sola persono qua sentas ulo sintetikatra en la vorto "paroladoze"? Forsan, me esas simple fola e no povis trovar plu apta formo. Quon me volas dicar kun co, esas la nomo di nova rus-lingula blogo, komencita da me kelka semani ante nun, e dedikita a lernado di lingui. Sua interretala adreso esas rechisto.posterous.com (me ja dicis ke me AMAS Posterous), e la vorto rechisto signifikas adverbo por adjektivo "paroladoza", o "plena de parolado". La nomo povas aspektar fola ed artificala, ma me selektis to pri la simpla fakto ke rusa vorto "язык", quo evidente povus uzesar en irga blogo pri ica temo, kontenas la litero "Ы" qua ne esas sendubite transliterata ad latina alfabeto.

Me kordiale invitas omni qua komprenas la rusa linguo "sequar" mea blogo e donar sua opnioni pri la kontenaji. Ibe me projetas skribor pri diversa temi: quale me ipsa lernas, quala tekniki existas, forsan mem relatanta joki ed interviuwi kun linguistikisti. Vi esas bonvenanta!

Permalink | Leave a comment  »

Ni selektis famoza Hard Rock Café por gustar pinto di Guinness, quo esas quaze synonimo di Irlandia por multa personi en la mondo. Ni sideskis en la restorerio e komendis la drinkaji, amikale babilante pri ecelanta muziko brodkastita per granda skreni e pri muzikisti qui donis kelka sua posedaji a café; e nur pos kelka minuti ni komprenis quo anke esas tre agreabla hike: nulu fumis. To esis neexplikeble bonega difero kun omna hispaniana restorerio, ube fumado esis permitita ante ca yaro.

E Guinness esis tre, tre bona.

Permalink | Leave a comment  »

Pro tre poka homi vivar en Estonia, la merkato por multa kozi esas tro mikra. To signifikas ke transportala gasti esas plu granda parto di precio en omno (komparante ad granda landi kom US, Germania o mem Hispania). Nunepoka ekonomio esas "the economy of scale", kande omno vendesas en granda quanteso.

Pedirante vespere en centro di Tallinn, me facis pauzo por fotografar la butiketo di elektroniko. Hike on povas vidar la buxi kun diferanta modeli di iPad, bonega komputoreto da Apple. La difero entre precio di plu chipa modelo en Estonia ed Hispania esas cirkum 110 EUR, e la maxim chera modelo kustas cirkum 180 EUR plu multe en Tallinn kam en Malaga.

Kompreneble, to esas nur un exemplo, e me parolis pri ulo quon listo de maxim necesa kozi ne kontenas. Ma la fakto esas ke estoniani ofte devas pagar pluse por la sama kozi kam habitanti di plu richa landi.

Permalink | Leave a comment  »

See the full gallery on Posterous

Multa amiki venabis helpar me, ma ni sucesis ekirar a l'urbo nur en lasta dio. E ke beleso esis la naturo cirkum la domo di matro di mea spozino! Nivo faliis du dii antee, ed omno esis kovrita kun blankeso, tranquileso, paco. Koldega aero esis tre pura. Cayare en Estonia trovesas multega nivo, e multa homi plendis ke ol esis tro multe. Ma por nia kurta e laboroza vizito, la vetero esis perfekta!

Permalink | Leave a comment  »

Hike on vidas me sidante apud la kirketo su la voyo de Mijas adsupre. To esis nia unesma foyo kande ni promenis en la monti di Mijas, belega urbeto ne for de Fuengirola (ube ni nun lojas).

Ica kirketo ne esas sempre apertita, to ne esas mem "iglesia" o "parroquia", ma simple "ermita" - me ne povas explikar bone en ido, do me uzis diferanta Hispana vorti por "kirko". Quale videsas de mea vizajo, on vidas tre bela cirkondaji de ca punto. Ma mem plu bela vidaji vartis ni en la fino di nia promeno (e ni atingis la alteso cirkume 900 metri).

Permalink | Leave a comment  »

En 2010, me deskovris du ecelanta nova platformi por krear blogi. Li nomesas Tumblr e Posterous. Amba esas tre facila por uzar - li ne havas multa kozi quin altra, plu olda platformi kom WordPress introduktis dum recenta yari, ma li facas sua laboro bonege.

Me facis sua blogo erste en Tumblr. Por testar quale on functionas. Me prizis. Do me quik kreis un altra, por idaji. Facilega naturo di Tumblr lasis me sendar postaji kun fotografuri facita kun portebla telefono, per la sama telefono! Me pensis, ke to povus esar revoluciono por blogado, por ke neexperiencoza uzanti povus plu rapide divenar experiencoza, kande blogado-djedai* povus sendar plu multe interesaji sen perdar muta valoroza tempo.

Pos kelka monati me trovis Posterous - qua esas same facila kom Tumblr, ma en ta dio havis plu bona aplikaciono* por mea iPhone. To esis vere importanta kozo por me. Altra granda avantajo di Posterous esis sua kapableso automatikale transsendar mea artikleti ad altra situi. Vere, Tumblr anke povas publikigar posti a Facebook e Twitter, ma Posterous povas facar lo ad plu multa altri situi. Me pensis ke to esas granda posibleso ordinigar mea postaji, kreante diferanta blogi pod omna kozi qui esas interesanta a me, ed agregar omna rusa-linguala sendaji a mea precipua blogo che LiveJournal.

Hodie me facis altra importanta pazo - me importacis mea anciena postaji de ido-linguala Tumblr-blogo adhike, en Posterous. To esas yen altra evidenta avantajo di ca ecelanta servico - importacado eventis rapide e korekte. Mem se Posterous, qua esas nuntempe tote gratuita, iros a por-pago modelo, me ne cesos uzar lo!

Permalink | Leave a comment  »

Recente me divenis adepto di Twitter. Dum kelka yari me ja esis enregistrata en ica web-situo, ma preske ne uzis ol. Tre neofte me sendis mea twitaji* per portebla telefono, kustumale dicante ulo pri desagreabla eventinta kun me.

Tri monati ante nun me vizitis un renkontro, adube omnamonate venas aktiva twitisti di Costa del Sol, danke la konsilo da mea bona Hispaniana amiko. Pro aspektar la korekta persono por asistar tala renkontro, me twitis plu multe dum kelka dii, e pos unesma renkontro me adjuntis kelka profili di altra participanti a mea 'amiki' (bone, teknikale, uzanti di Twitter ne 'amikeskas', ma 'sequas' ('Follow' en la Angla) altri).

Semani flugis, e me ipsa ne notis quale Twitter divenis un de maxim uzata servici da me. Do me nun povas kunpartizar mea pensi pri ol kun idistaro. Naturale, me skribas kun kelka vidpunto da difuzanto di linguo, por ke mea twitado esas fakte plu granda kam nur skribado pri un temo.

La maxim importanta informo pri Twitter es la limito por sendaji (en la Angla, qua donis ca vorto a mondo, tala sendajo nomesas "tweet", e me tradukas lo kom "twitajo" aden Ido), qua esas nur 140 literi. Tala limitajo semblas esar restriktiva, ma fakte, to esas bona ideo. Unesme, homi su kustumigas deskribar sua pensi plu kurte, duesme, on povas lektar tre multa twitaji da personi quin on "sequas", quo spensas min valoroza tempo, e triesme, 140 literi sendesas tre facile de diversa portebla aparati e mem inkluzesas en simpla SMS-mesajo. 

Twitaji povus kontenar ligili a pagini, fotografuri, videi - icakaze, la ligilo "kurtigesas" por posibligar sendanto adjuntar sua komentaro (altramaniere, la ligilo povus okupar majoreso de 140 literi o mem esar tro longa por un twitajo. Anke, on povas adjuntar aden texto di sua twito la ligilo ad altra Twitter-uzanti (Twitter-uzantonomo sempre komencas kun "@", exemple, mea nomo esas @barcodex) o specale formizita etiketi (Angla: "hashtags"). Etiketi esas tre utila, pro ke li posibligas strukturita serchado en tota Twitter. Idisti povus (e devus) adjuntar etiketo "#idolinguo" por plufaciligar serchado de twiti skribita en nia linguo.

Regretinde, ankore ne multa idisti twitas. Ma on povas facile trovar omni serchante #idolinguo ed explorante sua profili*. Grandega laboro facesas da nia amiko Bebson Hochfeld en Japonia, qua twitas sur la nomo "@BebsonJP". Anke uladie on povas lektar twitaji da altra idoparolanti, mem li skribas en sua propra patuazi*, exemple [kreinto di ParolezIdo] Rodrigo Gonzalez (@rodrigo_gonzlez), Kanadano Martin Lavallée (@martin_tango), yuna Holandano Joop Kiefte (@LaPingvino), diligentega Seulano Dave MacLeod (@Mithridates), Kostarikano @ArkBlitz.

Twitter esas tre efektiva por difuzar pensi e me esperas ke plusa idisti komencos uzar ol ed okazione komprenos quale facar to korekte, juoze ed utilege.

Permalink | Leave a comment  »

La festo ipsa meritas specala rankontro - ni havis tre bona klasi de kizomba, bachata, salsa, tango e pachanga, agreabla festi kun spektaklo facita da instruktisti, e mem komuna manjado de paella pos lasta klaso.

Pos vizitir dans-klasi e chefurbo di provinco, ni vehis ad naturala parko "Cabo de gata", ma me kredas ke to esus rezervata por altra sendajo! ;)

Permalink | Leave a comment  »

Permalink | Leave a comment  »

Me ja registrigis dek-e-kin blogi en Posterous. Aden duimo de li me ankore ne postis kelka kontenaji. Ka to esas tro granda projeti o me esas simple fola?

Permalink | Leave a comment  »